Кыргызстанда ВИЧ инфекциясын жуктургандар соңку эки жылда 1876 адамга көбөйдү. Бул тууралуу өкмөттөн кабарлашты.
Маалыматка караганда, акыркы 2020-жылдын 1-январына карата өлкөдө ВИЧ жуктурган 9680 адам расмий каттоодо турат. Ал эми алардын 680и 14 жашка чейинки балдар, 532си чет элдиктер.
6-февралда вице-премьер-министр Алтынай Өмүрбекова Бириккен Улуттар Уюмунун ВИЧ/СПИД боюнча программасынын (ЮНЭЙДС) атайын кеңешчиси Мишель Казачкин менен жолукту. Жолугушууда 2021-жылга карата кыргыз өкмөтү ВИЧ инфекциясын жуктуруп алуу учурларын 50% кыскартуу максатын коюп жатканы белгилүү болду.
Өмүрбекова Кыргызстанда ВИЧке каршы 2017-2021-жылдарга карата программа иштеп, бул илдетке чалдыккандарды аныктоо, жардам берүү ишин жакшыртуу аракети көрүлүп жатканын айтты.
Эске салсак, бул илдет алгач Кыргызстанда 1996-жылы аныкталып, ошол жылдан бери 2049 адам каза болгон.
Булак: NazarNews.kg
