“Үмүт 2020” кыймылы президентке кайрылды
Саясат  |   |  1159

“Үмүт 2020” саясий кыймылынын жетекчиси Ширин Айтматова президентке ачык кайрылуу жасады. Бул тууралуу өзүнүн социалдык баракчасына жарыялаган.

Маалыматка ылайык, ал кыймылдын кандайдыр бир саясий амбициясы жок экенин, өлкөдөгү коррупциялык көрүнүштөрдү ашкерелөөнү гана көздөрүн билдирип, президент Сооронбай Жээнбековдун кабыл алуусун өтүндү.

- Биздин айрым мүчөлөрүбүздү камап, мүлкүбүздү рейдерлик басып алуу аракети жүрүп, бизге карата аңдуу жана чагымчылдык аракеттер жүрүп жатат.

Сизден өтүнөрүм, мени “Үмүт 2020” кыймылынын өкүлү катары кабыл алыңыз. Сиз менен өлкөдөгү репрессиялар жана сөз эркиндигине басым тууралуу бетме-бет сүйлөшкүм келет, - деп билдирди Ширин Айтматова.

Эске салсак, жаңы түзүлгөн "Үмүт 2020" кыймылынын негизги максаты – азыркы парламенттеги депутаттардын былык иштерин ачып, элди 2020-жылдагы шайлоодо таза депутаттарды тандоого чакыруу. Бул кыймылдын түзүүчүсү - парламенттин мурдагы депутаты Ширин Айтматова. Айтматова буга чейин айрым саясатчылар, депутаттар жөнүндө иликтөөсүн жарыялаган.

Булак: NazarNews.kg

 

Поделитесь с друзьями